ဥရောပတိုက်၏ အမြင့်တကာ့အမြင့်ဆုံး ဘောလုံးချန်ပီယံ ဗိုလ်လုပွဲကြီးဖြစ်သည့် ချန်ပီယံလိဂ်ပွဲကြီးကား ၂၈ ရက် မေလ အင်္ဂလန်စံတော်ချိန် ၁၉၄၅ နာရီ မြန်မာစံတော်ချိန် ၂၉ ရက် နံနက် ၀၁၁၅ နာရီတွင် အင်္ဂလန်နိုင်ငံ ၀င်ဘာလေကွင်းကြီးတွင် စတင် ကစားခဲ့ပြီး၊ ဘောလုံးကစားချိန် မိနစ် ၉၀ အတွင်း၌ပင် အဖြေပေါ်ခဲ့ပြီဖြစ်သည်။
ဥရောပ၏အမြင့်ဆုံး ချန်ပီယံဘွဲ့ကို ဘာစီလိုနာအသင်းက သိမ်းပိုက်သွားခဲ့သည်။
ထိုပြိုင် မစတင်မီကပင် ဗိုလ်စွဲမည့်အသင်းကို ခန့်မှန်းကြရာတွင် ဘာစီလိုနာအသင်းက အသာစီးရခဲ့သည်။ မန်ယူပရိသတ် များနှင့် မန်ယူ၏ဇွဲနှင့် လျင်မြန်ဖြတ်လတ်မှုကို သိထားကြသောသူများက မန်ယူကို တစ်ပေးကြသည်။ ၀င်ဘာလေကွင်းသည် မန်ယူ၏အိမ်ကွင်းမဟုတ်ပါလော။
မန်ယူအနိုင်ရနိုင်သည်ဆိုသည့် သူများတွင် ကျွန်တော်လည်းတစ်ယောက် အပါအဝင်ဖြစ်သည်။ မန်ယူ၏သွေးကို ကျွန်တော် သိသည်ပဲလေ။
ပွဲအပြီး သတင်းစာရှင်းလင်းပွဲတွင်လည်း မန်ယူ၏ဂုရုကြီး ဖာဂူဆန်က ဘာစီလိုနာအသင်းသည် အကောင်းဆုံးဖြစ်ကြောင်း အ့ံဖွယ်အသင်းဖြစ်ကြောင်း၊ မက်ဆီကိုလည်းထိန်းချုပ်၍မရကြောင်း၊ ပွဲအပြီးတွင် ပိုကောင်းသည့်အသင်းက အနိုင်ရသွားခြင်း ဖြစ်ကြောင်း ပြောကြားခဲ့သည်။
ထိုပွဲနှင့်ပတ်သက်၍ အားကစားကျွမ်းကျင်သူ ကလောင်ရှင်များက မိမိတို့၏အမြင်များကို တင်ပြသုံးသပ်သော ဆောင်းပါး ပေါင်းများစွာ ပေါ်လာလိမ့်မည်ဟု ထင်ပါသည်။
သမိုင်းတစ်ခုကို ပြန်လည်တူးဆွခြင်းသည် အလွန်တရာလိုအပ်သောအချက်ဟု ကျွန်တော်ယူဆပါသည်။ ကျွန်တော်တို့ လူသားတိုင်း အမှားမကင်းကြပါ။ တခါမှားပြီးသော်လည်း ထိုအမှားမျိုးကိုပင် နောက်တကြိမ်၌လည်း ထပ်ပြန်တလဲလဲ ပြုလုပ် တတ်ခြင်းသည်ပင် ယနေ့လူသားတို့၏ ပကတိအနေအထားဟု ကျွန်တော်မြင်သည်။
ထို့ကြောင့် သမိုင်းကို မကြာခန တူးဆွပေးရသည်။ သို့မှသာလျှင် မေ့ပျောက်ပစ်ခါနီးအမှားကို အသစ်တဖန် ပြန်လှန်သတိရ ပြီး၊ အမှားနည်းသွားနိုင်သည်။ တချို့သောသူများကတော့ သမိုင်းကိုပြန်လည်တူးဆွခြင်းကို ငယ်ကျိုးငယ်နာဖော်ခြင်းဟု ယူဆ၍ မနှစ်သက်တတ်ကြသည်လည်းရှိသည်။ အမြင်မကျယ်ခြင်းမျှသာဟု ကျွန်တော်ကတော့ ယူဆသည်။
+ + +
ဘာစီလိုနာနှင့်မန်ယူတို့ပွဲအပြီးတွင် ဆရာကြီးဖာဂူဆန်၏ သတင်းစာရှင်းလင်းပွဲတွင် ပြောကြားခဲ့သော စကားများတွင် မန်ယူရှုံးနိမ့်ရခြင်း၏ အခြေခံအကြောင်းရင်းကို ဖျောက်ထားသည်ဟု ကျွန်တော်မြင်မိသည်။ တဖက်အသင်း ဘာစီလိုနာ၏ ဂုဏ်ပုဒ် များကို အထူးအလေးပေးသွားသည်ကို တွေ့ရသည်။
ထိုစကား၏လမ်းကြောင်းသည် မည်သည့်အရပ်သို့ ဦးတည်နေပါသနည်း။ ဘာစီလိုနာကောင်းလွန်းသောကြောင့် မန်ယူရှုံးရ သည်၊ မန်ယူ၏အားနည်းချက်မဟုတ်ပါဟု ကာပြော ပြောခြင်းမျှသာဖြစ်သည်။
ထိုစကားသည် ဆရာကြီးဖာဂူဆန်၏ မိမိကစားခဲ့သော ပွဲအပေါ်သုံးသပ်ချက် အစစ်အမှန်ဖြစ်ခဲ့သော် နောက်တကြိမ် ဘာစီလိုနာနှင့်မန်ယူဆုံခဲ့လျှင်လည်း မန်ယူရှုံးလိမ့်ဦးမည်ဟု ကျွန်တော် ထင်သည်။
ဆရာကြီးဖာဂူဆန်အနေဖြင့် လူကြီးရှက်တော့ရယ်ဆိုသလို စကားလှအောင်ပြောခြင်းဖြစ်၍ မန်ယူ၏အားနည်းချက်ကို သိသော်လည်း ထုတ်မပြောခဲ့လျှင်ဖြင့် နောင်တကြိမ်တွင် ဘာစီလိုနာနှင့်တွေ့လျှင် မန်ယူအနိုင်ရကောင်းရနိုင်ပါသည်။
ဘာစီလိုနာနှင့်မန်ယူတို့ပွဲကို ကြည့်ပြီးနောက် မန်ယူအရှုံးပေးခဲ့ရခြင်းမှာ ဘာစီလိုနာကောင်းလွန်းသောကြောင့် မဟုတ်ပဲ၊ မန်ယူညံ့လွန်းသောကြောင့်သာ ရှုံးရခြင်း၊ တနည်းအားဖြင့် နည်းပြဆရာကြီးဖာဂူဆန် ည့ံသောကြောင့်သာ အရှုံးပေးခဲ့ရခြင်းဟု ကျွန်တော် ကောက်ချက်ချလိုသည်။
ဆရာကြီးဖာဂူဆန်သည် ကမ္ဘာ့ဘောလုံးလောက၏ နည်းပြများတွင် ဂုရုကြီးတစ်ယောက်ဖြစ်ပါသည်။
သို့သော် ယခု ဘာစီလိုနာ – မန်ယူပွဲတွင်တော့ ပုထုဇဉ်လူသားဖြစ်သည့် ဂုရုကြီးဖာဂူဆန်လည်း တခါတရံတော့ ည့ံတတ်ပါ တယ်ဟု သက်သေပြသွားခြင်းဟု ကျွန်တော်မြင်သည်။
ဆရာကြီးဖာဂူဆန်၏ ဤတကြိမ်ည့ံဖျင်းမှုမှာ ရိုးရိုးည့ံဖျင်းမှုသာမက သွေးကြောင်သောည့ံဖျင်းမှုဟုပင် ကျွန်တော် အားမနာ တမ်းဆိုလိုက်ချင်ပါသည်။
ကျွန်တော့်အမြင်အရပြောရလျှင် ဆရာကြီးဖာဂူဆန်ကိုယ်တိုင် သွေးကြောင်သွားပြီး၊ သူ့အသင်း၏စွမ်းအားဟူသမျှကို သူကိုယ်တိုင်ဖျက်ဆီးပစ်လိုက်ခြင်းသာဖြစ်ပါသည်။
ဘာစီလိုနာနှင့်မန်ယူတို့၏ပွဲသည် ဘောလုံးသမိုင်းမှတ်တိုင်တခုဖြစ်သည်။ သမိုင်းတွင် သင်္ခန်းစာတစ်ခု ရှိကိုရှိတတ်သည်။ ထိုသင်ခန်းစာကို ကျွန်တော်တို့တူးဆွ၍ ပကတိအမြင်ဖြင့် အမှားကိုရှာဖွေနိုင်ရမည်။ သို့မှသာ နောက်တကြိမ်တွင် အောင်မြင်မှုရနိုင် သည်။ သမိုင်းကို တူးဆွပြီးသော်လည်း ပကတိအမြင်ဖြင့် မသုံးသပ်ပဲ အတ္တနောမတိဖြင့် မိမိလိုရာဆွဲ၍ သုံးသပ်ခဲ့လျှင် နောင်တကြိမ်တွင်လည်း အရှုံးနှင့်ပင် ရင်ဆိုင်ရဦးမည်ဖြစ်သည်။
+ + +
ချန်ပီယံလိဂ်ဗိုလ်လုပွဲ၏ အနေအထားအမှာ အောက်ပါအတိုင်း ဖြစ်သည်။
ဘောလုံးပွဲစပြီးနောက် ၁၀မိနစ်ခန့်အထိတော့ မန်ယူ၏ခြေအစစ်အမှန်ကို ကျွန်တော်တို့ကြည့်ခွင့်ရခဲ့သည်ဟု ဆိုချင်ပါသည်။ ဘောလုံးချစ်ပရိသတ်အနေဖြင့် ထိုပွဲကိုပြန်မြင်ယောင်ကြည့်ပြီး ကျွန်တော့်ဆိုစကားဟုတ်-မဟုတ် တွေးကြည့်စေလိုပါသည်။
နောက် တဖြည်းဖြည်း ဘာစီလိုနာကစားကွက်တွင် မန်ယူပြန်၍ မျောပါသွားသည်။ နောက်တော့ မန်ယူအရှုံးပေးလိုက်ရ သည်။
အကြောင်းရင်းကား မည်သို့နည်း။
ဆရာကြီးဖာဂူဆန်၏နည်းစံနစ်အမှားမှလွဲ၍ တခြားမရှိပါ။
သူ၏ဗျူဟာအမှားအယွင်းမှလွဲ၍ တခြားမရှိပါ။
သွေးရဲသောသူရဲနီတို့သည် တဖက်ရန်သူ၏တိုက်ကွက်ကို ခုခံရင်းသာ ကျဆုံးသွားခဲ့ရသည်။
ကွင်းဘေးမှအော်ဟစ်၍ ညွှန်ကြားသော ဆရာကြီးဖာဂူဆန်သည် သူရဲနီများကို ခံစစ်ဗျူဟာ ထိန်းချုပ်ဗျူဟာ ဟူသော သူရဲနီများနှင့် လားလားမျှ မစပ်သည့် ဗျူဟာများကို ဖိအားပေးခိုင်းစေရင်း သူရဲနီတို့ တဘက်တိုက်စစ်အောက်တွင် လည်စဉ်းခံခဲ့ရခြင်း ဖြစ်သည် ဟု ကျွန်တော်ထင်သည်။
ဘောလုံးပွဲတစ်ခု၏ အနိုင်အရှုံးတွင် ဂိုးသွင်းယူနိုင်ခြင်းကလည်း အကြောင်းတစ်ချက်ဟု ဆရာကြီးဖာဂူဆန် အဘယ်ကြောင့် လစ်လျူ ပြုခဲ့ပါသနည်း။
တဖက်တိုက်စစ်ကို အထင်ကြီးကြောက်ရွံ့ခြင်းနှင့် ဂိုးသွင်းဖို့ထက် ကလေးထိန်းခြင်းကို ဦးစားပေးလိုက်ခြင်းသည် ဆရာကြီး ဖာဂူဆန်၏အကြီးမားဆုံး အမှားဖြစ်သည်။
သူရဲနီတို့ မည်သည့်အသင်းကိုမဆို မွှေနှောက်ထိုးဖောက်၍ တဖက်အသင်း၏ဂိုးပေါက်ကို ခြိမ်းခြောက်၍ တုန်လှုပ် ခြောက်ခြား စေခဲ့သောကစားကွက်များကို သူ၏သွေးကြောင်မှုက ခွင့်မပြုခဲ့ချေ။
ဘောလုံးပွဲကြည့်ပရိသတ်များ သတိထားမိကြလိမ့်မည်ထင်ပါသည်။ သူရဲနီတို့ တိုက်စစ်ဆင် ကစားသောအခါ ချေပဂိုးကို ရ မိနစ် အတွင်း ရခဲ့သည်မဟုတ်ပါလော။ ထိုသည်ပင် သူရဲနီတို့၏သွေးဖြစ်သည်မဟုတ်ပါလား။
စိတ်ဓာတ်ရေးရာအရ ထိခိုက်နေသော ဂစ်ကိုထည့်သွင်းကစားခြင်းသည်လည်း ဆရာကြီးဖာဂူဆန်၏ ကြီးမားသော အမှား အယွင်းတစ်ချက်ဖြစ်သည်။ ဘာစီလိုနာ ပရိတ်သတ်များက ဂစ်၏အမည်မဖော်လိုသော အမျိုးသမီးနာမည်ကို ကွင်းဘေးမှပဲ့တင်ထပ် အော်ရုံဖြင့် ဂစ်သွေးလေခြောက်ခြားနိုင်သည်ကို ထည့်မတွက်ခဲ့ခြင်းကလည်း ဆရာကြီးဖာဂူဆန်၏အမှား ဖြစ်သည်။
ကွင်းဘေးမှနေ၍ သူ့ဗျူဟာကို ဆီမန်းမန်းသည်၊ ရွန်နီကို ညွှန်ကြားချက်များပေးသည်။
ဒုတိယပိုင်းပြန်အစတွင် သူရဲနီတို့ ဘောလုံးကန်ခွင့်မရတော့ပဲ ဘောလုံးဖျက်ခြင်းအလုပ်ကိုသာ လုပ်ရတော့သည်။
ဘယ် အလယ် နောက် အစွန်လူဖြစ်သော အီဗရာ၏ ဘယ်တောင်ပံမှ တင်ပို့မှုများမရှိ၊ မက်ဆီကိုသာ အသေကပ်နေရသည်။ ဘယ်ဝင်းမှ မွှေနှောက်ပေးမည့် နာနီကို မထည့်၊ ကုန်ကုန်ပြောရလျှင် ညာတောင်ပံမှ ထိုးဖောက်ဝင်ရောက်၍ ဂိုးရအောင် ဖန်တီးပေးတတ်သော ဗလင်စီယာလေး၏ ကစားကွက်ကို ကျွန်တော်အမှတ်မမှားခဲ့လျှင် တစ်ကြိမ်သာ တွေ့လိုက်ရသည်။
ကိုယ့်အသင်းသားများ၏ သူရဲနီတို့သွေးကို အထင်သေးပြီး၊ တဖက်အသင်းရှေ့တန်းကို အထင်ကြီးလွန်းခြင်းသည် ဒီတခါ တော့ဖြင့် ဆရာကြီးဖာဂူဆန်ကို အရှုံးကို ရင်ဝယ်ပိုက်စေခဲ့ပြီ ထင်သည်။
ဘောလုံးသည် ကန်ရန်ဖြစ်သည်၊ မိမိခြေထောက်နှင့်မိမိကန်ရန်ဖြစ်သည်၊ သူတပါး၏ခြေထောက်တွင် ရှိသောဘောလုံးကို ဖျက်ရုံမျှနှင့် ကျေနပ်ထိုက်သော ကစားနည်းမျိုးမဟုတ်ပါ။
အနိုင်အရှုံးဟူသည် ဘောလုံးပွဲတိုင်းတွင် တွေ့ရစမြဲဖြစ်သည်။ မည်သို့မျှ ထူးဆန်းသောကိစ္စမဟုတ်။ ရဲရဲရင့်ရင့် သူတင် ကိုယ်တင် ယှဉ်ပြိုင်ပြီး၊ ရှုံးရသော် ရှုံးသော်မှ ရှုံးရကျိုးနပ်သည်။ ယခုပွဲသည် ပိတ်ဆို့ကစား၍ သရေရလာဒ်ကိုဆုပ်ကိုင်၍ အမှတ်ခွဲေ၀ ယူရမည့်ပွဲမဟုတ်ပါ၊ အနိုင်အရှုံး ဆုံးဖြတ်ရသည့်ပွဲဖြစ်ကြောင်း ဆရာကြီးဖာဂူဆန် မေ့လျော့သွားသည်လား။
ကိုယ့်အသင်းသားတွေကို ကိုယ်မယုံလျှင် မည်သူယုံကြည်မည်နည်း၊ သူရဲနီတို့၏သွေး အေးသည်မဟုတ်၊ ရာဇဝင်နှင့် လာခဲ့သည်။ နောက်ဆုံးမိနစ်များတိုင် အဓိပ္ပါယ်ရှိခဲ့သော သူရဲနီတို့ ဒီတစ်ကြိမ်တွင်တော့ ဗျူဟာအမှား၏အောက်တွင် လည်စင်းခံခဲ့ ကြရသည်။
အရည်အချင်းရှိပါလျက် သွေးကြောင်ခြင်း၊ တနည်းအားဖြင့် ကြောက်ခြင်းသည် တရားကိုယ်ကောက်လျှင် ဒေါသတမျိုးသာ ဖြစ်သည်။ ဒေါသ၏နောက်တွင် မလွဲမသွေပါလာသည်ကား မောဟဖြစ်သည်။
ထိုမောဟ၏ဆိုးကျိုးကား အစားထိုး၍ မရတတ်ပါ။
ဘောလုံးကစားခြင်း နည်းစနစ်၏အောင်ပွဲအခြေခံအဖြစ် ယူဆထားကြသော “အကောင်းဆုံးခံစစ်မှာ တိုက်စစ်ဖြစ်သည်” ဟူသော ခိုင်မာသည့် အယူအဆတစ်ရပ်ကိုပင် ဆရာကြီးဖာဂူဆန်ကို မေ့လျော့သွားစေခဲ့သည်။
ဆရာကြီးဖာဂူဆန်၏အတွေ့အကြုံနှင့် ပညာများကို စာရေးသူကျွန်တော့်အနေဖြင့် လွန်စွာလေးစားပါသည်။
ဘောလုံးပညာနှင့်ပတ်သက်၍ သူအရည်အချင်းမှာ မြင့်မိုရ်တောင်ဆိုလျှင် ကျွန်တော်နားလည်ထားသည်မှာ ဇီးစေ့ခန့်မျှ ဖြစ်ပါလိမ့်မည်။
ယခု ကျွန်တော်၏သုံးသပ်ချက်သည် ဘောလုံးကစားခြင်းတခုတည်းကိုသာ ညွှန်းဆိုနေသည်မဟုတ်ခြင်းကို စာရှုသူများ သတိထားမိကြလိမ့်မည်ဟု ယူဆပါသည်။ အောင်မြင်မှုကို ဆာလောင်မွတ်သိပ်နေကြသော ကျွန်တော်တို့ကို ဆရာကြီးဖာဂူဆန်၏ ဆုံးဖြတ်ချက်က သင်္ခန်းစာတစ်ခု ပေးသွားသည်ကို မျှဝေခြင်းလည်းဖြစ်ပါသည်။
ထို့ထက်ပို၍
အရေးကြုံသက်လုံကောင်းရမည်ဆိုသော စကားပုံသည်လည်းကောင်း ငုတ်မိသဲတိုင် တက်နိုင်ဖျားရောက်ဟူသော စကားပုံ သည်လည်းကောင်း၊ လှေခွက်ချည်းကျန် အလံမလှဲဟူသော စကားပုံများသည် အောင်ပွဲခံနိုင်လောက်သည့် အရည်အချင်းရှိသူများ သွေးမနည်းဖို့ ရေးဖွဲ့ခဲ့ဟန်ရှိပါသည်။
ေနရီ 